عندك
وقت تسمعى : راجعى الفترة من أول نتيجة الانتخابات الأولى ومن قبل انتخابات
الإعادة وراجعى المعارضة للتيارات الدينية واقتراحهم الغريب إن مرسى يتنازل لصباحى
وراجعى اللى حصل فى الشارع من يوم مرسى ما مسك وقوليلى إزاى فى جو تربص للتيار
الدينى وشتيمة وتريقة وسب ومعارضة شغالة شرشحة على الفضائيات أو وقوف خلف رموز
فاسدة (عبد المجيد والزند والجبالى) أو التحالف مع فلول (عمرو موسى والبدوى) أو
معارضة بنكهة سما المصرى وإيحاءات باسم يوسم الجنسية (اللى جاب ورا لما لميس وعماد
أديب حمروا عينهم ليه لكن للأمانة رجل على مرسى) زيدى عليهم تركة هباب مدتها 30
سنة فى كل الملفات (وياريت تعملى قائمة بيهم) وقوليلى فى جو زى ده ممكن مرسى يشتغل
إزاى ... مش باقول إن الأداء ممتاز بس باقول مطلوب إنصاف ولو مش عاجبك إستعد
للانتخابات وفرصك عظيمة لإن الاخوان رصيدهم قل (والدليل نتائج الانتخابات الطلابية
رغم إن اللائحة اللى عملها الإخوان كانت مرفوضة) وللإسف الناس بتترحم على المخلوع
وكلابه لإنها مش شايفة بديل على الساحة محترم واتكلمى مع الناس وانت تعرفى بيحنوا إزاى
للمخلوع ....
فكك
بقى إن مرسى فقد شرعيته ومافقدش شرعيته والكلام العبيط ده الراجل نجح من غير تزوير
بدليل إن البلوفر قال أنا اتصلت أهنيه ماردش عليا ... وفكك برضه من تركيبات
المعارضة اللى مش موجودة فى السياسة العالمية زى حكومة ائتلاف ودستور توافقى ومصر
الكبيرة على أى فصيل لإن الكلام ده ما حصلش مع أى دولة مشيت مشوارها مع مشوارها مع
الديمقراطية.
سهل
قوى بعدها تقولى عليا إخوان لكن الحكاية ببساطة باتلفت حواليا بلاقى عالم فشلة
سياسيا وعالم مش عايزة تتعب وعايزة تجيلها سهلة عن طريق المجلس العسكرى اللى ينط
على الحكم ويسجن الاخوان (ايه الفرق بقى عن مبارك فى سجن المعارضين؟ فاكرين إن
المجلس العسكرى لو مسك هايديهالهم؟) المجلس العسكرى اللى فض أول اعتصام بعد الثورة
بالقوة وبطل أحداث ماسبيرو واللى رجالته سحلوا البنت وعروها فى التحرير وعملوا بى
بى من فوق مبنى مجلس الوزرا على المعتصمين وبمباركته كانت أحداث محمد محمود الأولى
؟
مرسى
لازم يكمل مدته عشان اللى ييجى بعده يكمل واللا اللى بيتعمل فى مرسى بحق وغير حق
هايتعمل فى اللى بعده ومافيش رئيس هايكمل ......
آسفة
إنى طولت عليكى لكن رجاء عيدى التكفير .. أما بقى حكاية قناعتى بمرسى أو غيره أنا
مقتنعة بالمسار الديمقراطى بالانتخاب والصندوق إن الناس تتعلم ويتشرح لها وناخد
بإيدها من غير فرض رأى مش بنخرجها من تحت سيطرة المخلوع عشان نخليها تحت سيطرة أى
فصيل سواء بدعوى دينية أو دعوى مدنية أو إن النخبة هى اللى بتفهم والناس لا
...
اللى
اختار غلط بكرة يتعلم يختار صح ونمشى المشوار ومافيش ثورة بتحقق أهدافها من أول
يوم واقرى تاريخ الثورات فى بلاد كتير وإنت تعرفى إن الثورة الفرنسية حققت أهدافها
بعد سنين ............ وحكاية إن الثورة مظاهرات واعتصامات وبس ده غباء ثورى وتخلف
وشباب طايش بيتلعب بيه لمصالح ناس قاعدة فى التكييف تتجار بيه ... صحيح تمت إزاحة
رأس نظام لكن لسه صوابعه فى مفاصل الدولة زى ما هى يبقى المسار السياسى مطلوب فى
النقابات والمحليات والبرلمان للتطهير ................ غير كده ممكن نقضيها شتايم
فى الإخوان ومرسى وفش غل وشكرا
تخيلى
بقى لو كانت المعارضة وافقت مرسى لما عزل عبد المجيد محمود وبدل ما تقف وراه فى
مؤتمر صحفى تعمل منه بطل ومفجر ثورة استقلال القضاء هو والزند وفوقهم تهانى
الجبالى تربية وتعيين سوزان هانم كانت قالت بس رجاء يا مرسى خلى مجلس القضاء
الأعلى هو اللى يختار ؟؟ فاهمة الفرق مش كان ساعتها يبقى ده التقويم الصح وكانت بقت
بداية لتطهير للقضاء ؟؟ ..........
هأقولك
على حاجة قالتها منال عمر بعد أزمة النائب العام إن فيه فصائل بتهاجم مرسى لمجرد
انه مايتنسبش ليه حاجة عدلة من أهداف الثورة قبل ماتنقلب وتقول المفروض يتعالج
نفسيا عشان كان فى السجن ونسيت تقول بالنسبة لمانديلا نحطه فى العباسية واللا نعمل
فيه ايه بعد 27 سنة سجن.
دمتى
بحب
ليست هناك تعليقات:
إرسال تعليق